Commission on Audit, nagmando sang fraud audit sa mga flood control projects sang DPWH sa Bulacan

Ginmando sang Commission on Audit ang pagpatigayon sang fraud audit sa mga proyekto sang flood control sang Department of Public Works and Highways (DPWH) sa Bulacan nga nagabalor sang P44 billion matapos ang mga issue nga ginbuyagyag ni President Ferdinand “Bongbong” Marcos Jr.

Nahibaluan nga sa kabug-usan nga P548 billion nga pondo para sa flood control sa bilog nga pungsod, pinakadako ang nagkadto sa Central Luzon nga may P98 billion kun sa diin ang Bulacan ang pinakadako sa rehiyon.

Suno sa COA memo sang Agosto 12, gilayon nga ginapa-audit ang imbestigasyon bangud sa mga issues nga ginlawag sang Presidente kag ginmanduan man ang mga distrito sang DPWH sa rehiyon nga magpasa gilayon sang mga dokumento para sa himuon nga audit.