Handa na ang Commission on Elections Bacolod sa pagsugod sang filing sang Certificate of Candidacy para sa mga luyag magpapili sa Barangay and Sangguniang Kabataan elections nga magasugod sa Lunes, Agusto 28, kag magatakop sa Setyembre 2.
Sa interview sang Bombo Radyo kay Bacolod City Election Officer Atty. Kathrina Trinio-Cana, ginahulat nalang ang Agusto 28 nga amo ang pagsugod sang filing sang Certificate of Candidacy.
Ang forms para diri ang sarang madownable sa Comelec website nga www.comelec.gov.ph kag sarang na ini maprint out sa lone size bond paper kag mafill out antes magpadulong sa Comelec office agud igapasa nalang.
Diri sa Bacolod, ang filing sang COC ang patigayunon sa Robinsons Place Bacolod sa Barangay Mandalagan halin Agusto 28 tubtub Setyembre 2.
Ang filing magasugod alas-8:00 sa aga tubtub alas-5:00 sa hapon bangud makasulod man sa mall ang Comelec staff antes ang mall hours.
Suno kay Cana, dapat nanotaryohan ang COC kag may naattach nga P30 nga documentary stamp antes dal-on sa Comelec office.
Dapat ifill-in man ang tanan nga data kag information sa COC kag butangan sang N/A kun indi applicable sa nagafile agud nga wala sang blangko.
Tatlo ka copy sang COC ang kinahanglan nga iprint bangud magakuha man sang copy ang notary-at-law.
Nagpahanumdom naman si Cana sa mga nagatuyo nga magfile sang COC nga temprano pa ini patigayunon kag ipacheck sa Comelec office agud masiguro nga wala sang kulang.
Dapat man nga mag-attach diri sang passport size nga ID kag ini ang recent.
