Nagtukod ang Commission on Elections (Comelec) sang isa ka task force sa pag-regulate sang mga survey firms sa tion sang eleksyon para sa 2025 midterm polls.
Antes sini, ang poll body nag-anunsyo sang Huwebes nga ang tanan nga mga survey firms dapat na nga marehistro sa poll body.
Gin-aprubahan sang poll body ang Resolution No. 11117 sa ila regular nga en banc session sang Pebrero 19 para sa nasambit nga tinutuyo.
Sa ginpagwa nga memorandum nga may petsa nga Pebrero 21, gintukod ni Comelec Chairman George Garcia ang Task Force Regulation and Enforcement of Survey Practices for Election Credibility and Transparency (Task Force RESPECT).
Ang task force ang gin-assign nga mag-facilitate sang reporting mechanism sang mga survey firms sa Comelec kag i-publish ang ila findings sa Comelec website.
Ang task force man ang maga-orient sa mga survey firms, individual pollsters kag sa publiko nahanungod sa Comelec Resolution No. 11117 kag Republic Act No. 9006 ukon ang Fair Election Act.
Ang nasambit man nga grupo ang maga-uyat kag maga-imbestigar sang mga reklamo may kaangtanan sa “improper or inappropriate publication of election-related surveys.”
Si Director Efraim Bag-id, pinuno sang Comelec Political Finance and Affairs Department ang magapungko bilang chair sang task force.
