Nagapadayon ang preparasyon sang Commission on Elections para sa Barangay and Sangguniang Kabataan elections sa Disyembre 5.
Sa interview sang Bombo Radyo kay Bacolod City Election Officer Atty. Katrina Trinio Cania, handa ang Comelec sa piniliay apang magadepende naman sa Kongreso kun mapasar sila sang hagna nga magapostpone sang eleksyon.
Suno kay Cania, 2018 pa kuntani ang eleksyon apang napostpone sang tuig 2020 tubtub gin-isol sa December 5, 2022.
Sa karon, padayon ang voter registration nga ginapatigayon sang Comelec kag ini ang magatakop sa Hulyo 23.
Ang mall registration ang ginapatigayon sa karon sa Ayala Capitol Central kag igasaylo naman ini sa Robinsons Place sa masunod nga semana.
550 ka mga aplikante ang ginahatagan sang numero kada adlaw.
Suno sa election officer, indi magnubo sa 3,000 ang total applicants as of July 12 apang indi tanan ang madugang sa numero sang mga voters bangud ang application ang igapaidalom sa Election Registration Board hearing.
Aminado naman ini nga mga pamatan-on ang kalabanan nga nagaparehistro bangud sa Sangguniang Kabataan elections.
Sang May 9 elections, ang Bacolod ang may 327, 403 total registered voters.
