Handa na ang Commission on Elections sa bilog nga Western Visayas sa filing sang Certificate of Candidacy sang mga magapadalagan sa Barangay kag Sangguniang Kabataan elections sa Oktubre 30.
Suno kay Comelec Region 6 Director Atty. Dennis Ausan, handa na ang mga field personnel kag nagahulat nalang sang pagsugod sang election period sa Agusto 28 nga amo man ang una nga adlaw sang filing sang COC, tubtub sa Setyembre 2.
Suno kay Ausan, nakaimprinta na sang list of voters samtang ang iban nga local Comelec offices ang nakatalana nga magpatigayon sang final verification and sealing.
Sa karon, ginahulat nalang ang training para sa field officials agud nga matraining man sang mga ini ang mga manunudlo nga magaserbe sa eleksyon sa Oktubre 30.
Nagapakig-angot man ang Comelec Region 6 sa mga deputies kaangay sang Armed Forces of the Philippines, Philippine National Police, mga partners sa Department of Education, Department of the Interior and Local Government kag Philippine Coast Guard bangud madamo ang island barangays.
Suno kay Ausan, ginahulat nalang ang pagconvene sang national level sang National Joint Security Control Center agud nga makaconvene man sini ang region, panaog sa probinsya, banwa kag mga ciudad.
Suno kay Comelec Region 6 director, ginalauman ang mataas nga turnout of voters sa Barangay elections bangud sa masami, pinamilya ang away sa nasambit nga piniliay.
Nahibaluan nga pati ang mga pamatan-on nga nagaedad sang 15 tubtub 17 ang magaboto man sa Sangguniang Kabataan elections.
Mangin manual naman ang eleksyon sa Barangay kag Sangguniang Kabataan kun sa diin igasulat sa balota ang ngalan sang nahamut-an nga kandidato.
