Gin-ako sang Commission on Human Rights nga tuman kasangkad ang gahom sang Anti-Terrorism Act of 2020 nga nagahulat nalang sang pirma ni Presidente Rodrigo Duterte agud nga mangin layi.
Nahibaluan nga indi na maglabay sa bicameral conference committee ang hagna bangud pareho ang version sang Kamara kag sang Senado.
Sa interview sang Bombo Radyo kay CHR Negros Occidental head Romeo Baldevarona, kinahanglan nga masafeguard ang tawhanon nga kinamatarong sang mga Pilipino sa amo nga layi ilabi na nga may provision ini nga sarang lang maaresto ang isa ka suspected person nga wala sang warrant of arrest kag sarang madetain sang 14 ka adlaw, extendible sang 10 ka adlaw.
Sa tion nga indi mangin mahinalungon ang law enforcers suno kay Baldevarona, madamo ang pagaarestuhon bangud sa mere suspicion kag indi man magbayad sang damages ang nagsala nga otoridad bangud ginkakas sang hagna ang provision sang Human Security Act of 2007 nga magabayad ini sang 500 mil pesos nga damages sa kada adlaw sang detention.
Sarang man nga mapriso ang isa ka persona nga wala ini ginpahibalo sang iya specific charges.
Suno kay Baldevarona, tuman katalom ang amo nga kasuguan apang wala ini nagadagdag sang accountability sa law enforcer nga magsala.
Kun indi ini maplantsa sang maayo suno sa CHR official, madamo ang inosente nga mabiktima bangud sa mere suspicion kaangay sang Anti-Subversion Law nga gin-repeal sang panahon ni anay Presidente Fidel Ramos.
