Na-release na subong nga adlaw ang anom ka mga bangkay sang ginaalegar nga miyembro sang New People’s Army nga napatay sa ginapahayag engkwentro batok sa mga suldado sa Purok Lubi, Barangay Tabugon, Kabankalan City sang Setyembre 21.
Ginkilala ang anom ka gina-alegar nga NPA nga sanday Alejo Delos Reyes nga kilala bilang Peter ukon Bravo, Squad Leader sang Squad 2 sa Sangay Yunit Propaganda Platoon 3; Marjon Alvior, nga kilala man bilang Kenneth, Vice Squad Leader sang Squad 2, SYP Platoon 3; Bobby Pedro, nga kilala man bilang Recoy, Vice Squad Leader sang Squad 3 sang pareho nga platoon; Mario Fajardo Mullon, nga kilala man bilang Reco ukon Goring, Medic sang Squad 1 gikan sa pareho nga platoon; Melissa Dela Pena, nga kilala man bilang Diane, ang asawa ni alias Bravo; kag si Ruben Gaitan ang driver sang tricycle.
Sa interview sang Bombo Radyo kay Brigadier General Joey Escanillas, commander sang 302nd Infantry Brigade, nagpadulong ang mga pamilya sang mga napatay para I-proseso ang pagclaim sang ila himata kag sila makabaton sang assistance naggikan sa Local Government Unit sang Kabankalan.
Suno diri, iban sa mga napatay ang nagapuyo sa ciudad sang Guihulngan kag banwa sang Ilog kag Cauayan apang ang residente gid lamang sang Kabankalan amo ang driver sang tricycle nga ginasakyan sang mga gina-alegar nga miyembro sang NPA.
Ginkumpirma man nga nagabusong si Melissa Dela Pena, sang tatlo tubtob apat ka bulan nga asawa ni alyas Bravo.
Samtang, padayon man ang operasyon sang Philippine Army sa pag-coodinate sa tanan nga mga area sa probinsya agud masiguro ang siguridad kag mangin matawhay ang pagpatigayon sang Barangay and Sangguniang Election 2023.
