Napasaka na sa plenaryo sang House of Representatives ang committee report sang articles of impeachment batok kay Vice President Sara Duterte.
Base sa mga artikulo sang impeachment nga gin-aprubahan sang House Committee on Justice, ang bise presidente ang mangatubang sang kaso nga betrayal of public trust, culpable violation of the Constitution, korapsyon, kag iban pa nga mga mabug-at nga krimen may kaangtanan sa abuse of confidential funds; unexplained wealth; bribery; assassination plot kay President Ferdinand Marcos, Jr., First Lady Liza Marcos, kag former Speaker Martin Romualdez.
Magapili sang 11 ka miyembro sa Kamara nga magaserbe bilang public prosecutors sa trial.
Mahimo mangayo man sang bulig naggikan sa mga private prosecutor.
Suno kay House Justice Committee Chairperson kag Batangas 2nd District Representative Gerville Luistro, ginalauman nga handa na ang Kamara magboto sa articles of impeachment batok kay VP Duterte sa Mayo 11.
Suno diri, kun mapanagtag na ang kopya sa mga miyembro, may yara pa sila sang supisyente nga tion humalin Miyerkules tubtob Dominggo agud basahon kag tun-an ang artikulo.
Nagpabutyag man sang kumpiyansa si Luistro nga maaprubahan sang plenaryo ang committeee report kag makakuha sang ginakinahanglan nga 106 nga boto.
Samtang ginpanginwala naman sang pila ka mga miyembro sang komitiba kaangay nanday Deputy Minority Leader Rep. Antonio Tinio kag Justice Committee Vice Chair Rep. Jose Alvarez, ang mga report nga may mga mamalidha nga nag-atras na sa ila suporta sa committee report.
