Ginaengganyo sang chairman sang Committee on Health and Sanitation sa Sangguniang Panlungsod sa syudad sang Bacolod ang mga pumuluyo nga magkuha sang booster shot sang COVID-19 vaccine kasunod sang nakita nga amat-amat nga pagsaka sang kaso sang COVID-19 sa syudad sang Bacolod.
Sa interview sang Bombo Radyo Bacolod kay Councilor Kalaw Puentevella, ginaengganyo ang tanan nga mga pumuluyo sa syudad sang Bacolod nga magkuha na sang booster shots sang COVID-19 vaccine para sa dugang nga proteksyon batok sa nasambit nga balatian.
Nagpanugyan man si Puentevella nga masami magsuksok sang facemasks kag magpanghugas sang kamot agud indi madasig nga matapikan sang balatian.
Santo sa ulihi nga data sa bulan sang Abril ang syudad sang Bacolod ang may yara sang narekord nga 227 nga kaso sang COVID-19 kun sa diin walo na ang ginbawian sang kabuhi tungod sa balatian samtang kalabanan naman sang natapikan sang balatian ang wala mabakunahan.
Samtang, ginaengganyo man ang pagsuksok sang face mask kun yara sa public transport ilabi na sa modernized jeepney nga bangud may yara ini sang aircon.
