Ginaengganyo sang chairman sang committee on health sa Sangguniang Panlungsod sang Bacolod ang mga estudyante nga kwalipikado na sa booster shots batok sa COVID-19 nga mag-avail na sini.
Sa interview sang Bombo Radyo kay City Councilor Kalaw Puentevella, nagalibot ini sa mga eskwelahan agud ikampanya ang pagpabakuna batok sa COVID.
Ginakampanya man sini ang pagpatublok sang booster shots para sa mga nakabaton na sang duha ka dose sang bakuna agud nga may dugang nga proteksyon.
May isa naman ka eskwelahan nga luyag sang principal nga irequire gihapon ang face shield apang ini ang magadepende sa luyag sang ginikanan bangud bastante na ang face mask.
Gin-athag naman sang DepEd nga indi required ang vaccination sa mga kabataan agud nga makabalik sa sulod sang classroom apang ginaengganyo ang pagpabakuna agud nga indi malala ang sintomas kun matapikan sang coronavirus.
Sarang makapabakuna sa mga vaccination centers kaangay sang mall kag magdala lamang sang certificate of live birth.
