Ginpahanumdom sang chairperson sa Committee on Transportation sa Sangguniang Panlungsod sa Bacolod, nga ginadumilian ang pagpark sa National Government Road.
Sa interview sang Bombo Radyo Bacolod kay Councilor Al Victor Espino, magapatigayon ini sang information dissemination partikular na sa mga business establishments agud ipahanumdom ang kasuguan.
Madumduman nga masobra 30 nga mga motorsiklo nga ginapanag-iyahan sang mga empleyado sa Business Process Outsourcing (BPO) Company, ang gintow sang Bacolod Traffic Authority Office bangod sa pagpark sa walk way sang Lacson Extension tinalikdan nga inadlaw.
May mga nagakomentaryo nga dapat naghatag anay sang warning antes ginpatigayon ang operasyon, apang paathag ni Espino nga madugay na nga layi ang pagdumili sa pagpark sa National Government Road.
Suno diri, bangod may kapasidad na ang BTAO sa pagpatuman sang layi pinaagi sa Metro Towing Services Inc. ini ang nagakadapat na nga mapatuman.
Paathag sini nga kun indi ipatuman sang estrikto ang layi, magabalik-balik lamang ang kaangay nga bayolasyon.
Aminado si Espino nga madamo sang nagapanindugan nga sila ang wala nakahibalo sa layi, gani plano na sini nga magpatigayon sang information dessimination partikular na sa mga establishimento nga yara sa kilid sang mga National Government Road.
Aminado ang konsehal nga nahimo naman nila sadto ang kaangay nga programa sa mga eskwelahan, gikan sa Elementarya tubtob sa Kolehiyo.
Dugang pa sini nga ginadumilian man sa mga National Government Road ang pagbutang sang reservation nga parking area.
Paathag sang konsehal nga ang public roads ang para sa tanan gani indi pwede nga magbutang sang reservation bisan pa ang mga establishimento nga yara sa atubang.
Pahayag ni Espino, nga siya ang magarequest sa BTAO sa implementasyon sang nasambitan nga pagsulundan.
