Ginahulat pa sang Sangguniang Panlungsod sa ciudad sang Bacolod ang committee report sa ginpatigayon nga commitee hearing para sa Resolution of No Objection sa dugang nga 25 hectares nga ireclaim sang Bacolod Real Estate Development Corp. (BREDCO) kag pagpamalabag sang ALMANA Property and Development Corp. (APDC).
Sa interview sang Bombo Radyo Bacolod kay Councilor Al Victor Espino, chairman sang Committee on Laws and Ordinances and Good Governance sa Sangguniang Panlungsod, ang resulta sang committee hearing ang ginatranscribe pa sang mga stenographer gani ginahulat pa nila ini.
Ang committee hearing ang gintambungan sang walo ka mga konsehal kun sa diin ginpadangat man sang ALMANA Property and Development Corp. (APDC) ang ila mga concerns sa pagpamatok nga mahatagan sang RONO ang ginapangayo sang BREDCO nga dugang nga 25 hectares.
Suno kay Espino, para sa ihibalo sang tanan, ang reclaimation ang nagapanag-iya ang ciudad sang Bacolod kag sa tanan nga puerto kag ini ang nakasaad sa tripartite agreement nga ginpirmahan sang BREDCO, Philippine Reclaimation Authority kag City of Bacolod.
Suno kay Espino ang nagapanag-iya sang reclaimation ang ciudad sang Bacolod apang ang developer amo ang BREDCO.
Suno diri ang natabo, sang nakaligad nga tuig ang BREDCO ang nagpangayo sa ciudad sang pahanugot sang dugang nga 25 hectares nga reclaimation para sa maintenance sang port apang isa ka portion sang ginapangayo nga ireclaim ang nagdangat sa property nga ginapanag-iyahan ang ALMANA.
Suno sa diri, ang ginapahayag sang APDC nga indi dapat magreclaim ang BREDCO sa ginbakal nila nga propiyedad ang indi lamang promisa kundi ini ka contractual obligation bangud nakasaad ini sa Deed of Sale sa tunga sang ALMANA Property and Development Corp. (APDC) kag Bacolod Coastal Ventures Corp. (BCVC).
Suno sa konsehal, ang nasambit nga contractual obligation man ang rason ngaa nagfile sang objection sa RONO ang ALMANA.
Suno kay Espino pamatian man sang committee kag sang Sangguniang Panlungsod ang magtimbang nga bahin kag kun kinahanglan pa sang isa ka committee hearing ang duha ka kumpaniya indi ang mga ini magpangduha-duha sa pagpatigayon.
Samtang, ginpahayag man sang konsehal nga indi dapat magpabayad Bacolod Real Estate Development Corp. (BREDCO) sang toll fee sa mga nagasulod sa port bangud nakasaad sa Comprehensive Revised Reclamation Agreement (CRRA) nga karsada nga nakapalibot sa lugar ang ginapanag-iyahan sang ciudad.
Suno diri natawag naman sang Sangguniang Panlungsod ang igtalupangod sang management angot diri apang wala man ang mga ini nagsabat.
Suno kay Councilor Al Espino, dapat nga respetuhon man sang developer ang Sangguniang Panlungsod kag sabton ang mga issues nga ginapangayuan sang sabat nagikan sa ila.
