Magaupod ang mga katapo sang Community Environment and Natural Resources Office (CENRO) – Bago City sa Commission on Elections (COMELEC) sa pagpangbaklas sang mga posters sang lokal nga mga kandidato nga nakalansang sa mga puno sang kahoy sa probinsya sang Negros Occidental kadungan sang pag-umpisa sang campaign period para sa local candidates.
Sa interview sang Bombo Radyo Bacolod kay CENRO Bago City Head Engineer Joan Nathaniel Gerangaya, ginahulat na lamang nila ang pagpatawag sa ila sang COMELEC agud nga makaupod sa Task Force BAKLAS.
Suno kay Gerangaya, kinahanglan nila nga mag-upod sa Task Force sang COMELEC sa pagpangbaklas bangud wala man ang mga ini nakahibalo kun sa diin ang mahimo butangan sang poster kasubong man ang non-posting areas.
Suno diri, madamo na sang mga puno sang kahoy sa probinsya nga ginbutangan sang posters sang mga kandidato kag ini ang maathag nga paglapas sang pagsulundan sang COMELEC.
Nahibaluan nga indi man mahimo makakas ang mga posters sang mga kandidato nga nabutang sa mga pribado nga propidad bangud sa Temporary Restraining Order (TRO) nga ginpagwa sang Korte Suprema.
