Ginpatpat sang isa sa mga complainant batok kay former president Rodrigo Duterte ang mga rason sa pagpasaka sang disbarment case sa anay presidente.
Sa interview sang Bombo Radyo Bacolod kay Lean Redino Porquia, ang pagfile sang disbarment case ang indi basta-basta lang bangod nagakinahanglan ini sang nagakaigo nga rason para kakson ang lisensya sang isa ka abogado.
Ang amay ni Lean Redino Porquia amo si Bayan Muna Iloilo City coordinator Jory Porquia nga ginluthang sang Abril 2020 sa sulod mismo sang ila balay sang laganap pa sadto ang Extra Judicial Killings.
Suno kay Lean, nagfile sila sang disbarment batok kay Duterte kasunod sa pahayag sini nga siya ang magatindog nga abogado ni Vice President Sara Duterte kun mafile ang ikaapat nga impeachment complaint sa iya.
Para kay Lean, wala sang moral grounds ang anay presidente bilang isa ka abogado.
Dugang pa sini, mismo si Duterte man ang nagpahayag sa quadcomm hearing nga matuod nga siya ang nagsugo sa pagpamatay sa idalum sang iya administrasyon.
Isa pa gid sa rason sa pagpasaka sang disbarment amo nga sadto indi pa nila ini mahitso bangod si Duterte pa ang presidente, apang sa karun may ligwa na sila para magiho.
Sa karun suno kay Lean, nagapangayo na sang simpatiya ang kampo ni Duterte nga indi na pagdayunon ang disbarment bangod indi na makapractice sang abogasiya si Duterte dala sang katigulangon sini.
Apang suno diri, sila nga nagcomplaint sang disbarment ang nagapangayo sang hustisya kag nagademand nga sabton ni Duterte ang mga ginhimo sini.
