Gindala sa Bago City Police Station ang Violence Against Women and Children officer sang Barangay Busay, Bago City kag ang complainant nga una na nagreklamo sa Bombo Radyo Bacolod matapos liwat nga may nagluntad nga komosyon.
Madumduman nga nagreklamo kahapon si Analiza Matinong, bangod sa gina-alegar indi pag-atinder sang VAWC sang Barangay sa iya reklamo batok sa iya bana, kag kaangay nga sa bana pa niya nagadampig.
Alegasyon sini nga ang iya bana ang may kerida kag ginakuha sini isa isa ang mga napundar sini nga gamit sa ila balay.
Bangod sa ila away, nakaangkon man sang lagob si Matinong matapos mahan-usan sang iya bana.
Sa interview sang Bombo Radyo Bacolod sa tagreklamo, ginsunod sini ang rekomendasyon sang Bombo Radyo Bacolod nga magkuha sang Barangay Protection Order sa Barangay Hall, apang sang siya ang nagasulat na sa form, alegasyon sini nga siya ang ginwara-wara ni VAWC officer Gelanie Legaspi.
Bangod siya ang nagpalangurog na matapos singgitan sang natungdan, wala sini gintapos ang form kag naggwa nga nagahilibion.
Suno diri, siya ang nagapangayo sang bulig apang kaangay pa nga siya ang malain.
Tubtob nga nag-abot ang Special Weapon and Tactics (SWAT) personnel sang Bago City Police Station kag siya ang gindala sa estasyon kasubong man si Legaspi.
Nagparecord lamang si Legaspi kag siya ang ginblotter bangod sa gina-alegar malesyoso sini nga facebook post batok sa ila.
Samtang si Matinong ang ginsugilanon naman sang kapulisan, kag iya man nga ginpalab-ot ang iya hibubun-ot.
Kasunod sini, si Matinong ang gin-updan sang Bombo News Team agud matapos ang pagfill out sang Barangay Protection Order.
