Nagalaom ang General Manager sang Central Negros Electric Cooperative (CENECO) nga antes matapos ang termino ni Bacolod City Mayor Alfredo “Albee” Benitez, makadihon na sang Compromise Agreement natuhoy sa utang.
Sa interview sang Bombo Radyo Bacolod kay Atty Arnel Lapore, sa karun nagapadayun pa ang paghinun-anon tuhoy sa P271 million nga utang sang Bacolod City Government sa Ceneco, sa baylo ang Ceneco ang may balayran man nga real property tax sa ciudad.
Nagalaom si Lapore nga ma-offset ang bahin sang mga balayran kag sa tion nga mabuhin sa balayran sang ciudad sa Ceneco ang bayad sa real property tax, yara na lamang sa P180 million ang balayran sang City Government sa kooperatiba.
Suno diri, luyag kuntani nila makahinun-anon sa alkalde apang ini ang nagbakasyon pa abroad, gani sila ang maga-arrange na lamang sang appointment sa pagbalik sini sa ciudad subong nga Enero.
Pahayag ni Lapore nga ang ibayad sang ciudad ang mabalik man gihapon sa mga pumuluyo nga sarang madugang sa mga electrification projects, street lightings ukon pag-imprubar sang existing facility.
