Ginklaro ni Bacolod City Lone District Representative Alfredo “Albee” Benitez nga wala pa nakadesisyon ang Love Negros kag UNEGA para sa magakandidato bilang gobernador sa probinsya sang Negros Occidental sa 2028.
Apang siya ang handa nga magsuporta kun magapapili sa pwesto ang iya bata nga si 3rd District Representative Javier Miguel “Javi” Benitez.
Sa interview sang Bombo Radyo Bacolod kay Congressman Albee, wala pa sang kumpirmasyon kun magapapili gid man sa pagka-gobernador ang iya bata.
Siya ang magahingyo naman kay Negros Occidental Governor Eugenio Jose “Bong” Lacson nga magpatawag sang meeting sa tunga sang Love Negros kag UNEGA agud madiskusyunan ang plano.
Apang para kay Cong. Albee, malayo pa ang 2028, kag mas maayo nga tutukan anay ang mga issue kag problema nga kinahanglan ma-address sang tagsa ka distrito.
Dugang pa niya nga ang desisyon sang duha ka partido ang indi gikan sa desisyon sang isa lamang ka persona, kundi ini ang gikan sa consensus ukon makasugtan sang duha ka partido.
Ini bangod matunog na nga nagakabatian ang posibilidad nga si Rep. Javi Benitez kag Negros Occidental 2nd District Rep. Alfredo “Thirdy” Marañon amo ang magabunggu-anay sa pagpapili bilang gobernador sa 2028.
Sa pihak sini, pahayag ni Benitez nga madamo sadto sang nagapadala sang reklamo sa 888 hotline nga nagareklamo sa gina-alegar pagplastar sang mga magapapili sa pwesto, bangod mas luyag nila nga may-ara sang pilian.
Ini ang ginapaboran man ni Cong. Albee sa panindugan nga mas makapili ang pumuluyo sang para sa ila nagakadapat sa pagserbisyo kun madamo sang kandidato nga mapilian.
