Halos tanan nga Local Government Units sa 5th District sang probinsya sang Negros Occidental ang apektado sang pagbaha kahapon.
Sa interview sang Bombo Radyo kay Negros Occidental 5th District Representative Atty. Dino Yulo, nagkanay-kanay na ang ulan kagab-i kag amat-amat man nga nagsubside ang tubig kun ikumpara kahapon sang kaagahon kun sa diin ang mga dalan kag taytay indi malabayan bangod sa baha.
Suno diri, apektado sang pagbaha ang Himamaylan City, Binalbagan, Hinigaran, Isabela, Moises Padilla samtang ang La Castellana naman ang wala maayo naapektohan.
Ginlibot sini ang mga dalagko nga suba agud matsekyar ang sitwasyon sa lugar kag sang mga pumuluyo.
Ginalantaw sini nga rason sa madasig nga pagsaka sang baha amo nga madutay na lang ang kahoy sa mga bukid, wala na sang runoff water kag ang basura sa lugar nga wala nahimos.
Pahayag sini dapat na gid nga irestore ang kagulangan, magpatigayon sang dredging sa suba kag dapat may effort sang komunidad agud malimpyohan ang drainage.
