Plano ni Negros Occidental 5th District Representative Atty. Dino Yulo nga magahatag sang privilege speech sa pagbukas sang session sa Kamara angot sa sitwasyon sang mga evacuees sa banwa sang La Castellana, Negros Occidental.
Nahibaluan nga 33 ka pamilya ukon 80 ka mga indibidwal ang naghalin sa evacuation center sa covered court sang La Castellana National High School agud nga magpauli sa ila nga balay nga wala sang pahanugot sang Local Government Unit.
Ang nasambit nga evacuees ang nagapuyo sa sulod sang 6km extended danger zone sang Bulkan Kanlaon.
Santo sa alegasyon sang mga evacuees nga ginapabay-an lamang sila didto kag ang ila ginatiniran nga tent ang nagatinulo sa tion nga maulan.
Apang ini ang ginpanginwala sang pinuno sang La Castellana Municipal Disaster Risk Reduction and Management Office bangud ginatinguhaan sang banwa nga mahatagan ang mga ini sang pagkaon kag ang tent sang mga ini ang waterproof.
Suno sa pinuno sang La Castellana CDRRMO indi insakto ang ginhimo sang mga evacuees bangod delikado sa gihapon ang aktibidad sang bulkan.
Suno kay Congressman Yulo, “physically tired, mentally disturbed, psychologically distressed kag sexually deprived” na ang mga evacuees bangud sang kapin anom ka bulan nga pagpabilin sa evacuation center matapos naglupok ang Bulkan Kanlaon.
Apang sa pihak sini, wala pa sang maathag nga plano nga ginlatag sa ila ukon sa mga opisyales, kalakip na kay Yulo, kun ano ang matabo sa masunod nga binulan ukon tuig.
Nagapati ini nga indi magpuyo sa tent city ang mga evacuees, indi man mabayaan sang mga ini ang ila nga palangabuhian kag subong man, nagakabalaka ang mga ini sang ila palaabuton.
Suno diri dapat may yara na sang klaro nga plano para sa mga evacuees ang Office of the Civil Defense angot sa Internally Displaced Persons bangud kun wala pa mahimo ini sang privilege speech agud nga ipalab-ot ang sitwasyon sang mga evacuees sa mga kaupdanan sini sa Kamara.
