Ginpalab-ot ni Bacolod City Lone District Congressman Greg Gasataya kay National Inter-Agency Task Force Chief Implementer Secretary Carlito Galvez, Jr. ang panawagan sang mga negosyante kag public transport groups sa ciudad nga apektado sang COVID-19 pandemic.
Sa interview sang Bombo Radyo kay Gasataya, ginpahayag sini sa sulat nga iya ginpadala kay Secretary Galvez nga nagahingyo ang Metro Bacolod Chamber of Commerce and Industry kag ang grupo sang Micro, Small and Medium Enterprises sa pagpatuman sang “granular lockdowns” sa tunga sang ginapatuman nga Modified Enhanced Community Quarantine (MECQ) sa ciudad.
Sa pagpatuman sang granular lockdowns, ang mga barangay ukon lugar lamang sa ciudad nga may madamo nga kaso sang COVID-19 ang ipaidalum sa hugot nga community quarantine protocols agud nga sarang maka operate ang iban nga mga business establishments.
Ginpadangat man sang kongresista sa tiglikum ang panawagan sang public transport groups nga pagpanumbalik sang biyahe sa ciudad agud nga mabalik ang palangabuhian sang mga drivers nga apektado sa pagpatuman sang MECQ humalin sang Setyembre 8.
Gindugang man sini nga bangud limitado lamang sa karon ang public transportation nga nagabiyahe sa ciudad, madamo sang mga pumuluyo ang nabudlayan sa pagpangita sang may masakyan para sa ila matag adlaw nga kinahanglanon ilabi na nga magabukas na ang klase sa Oktubre 5 kag madamo nga mga ginikanan ang magapadulong sa eskwelahan agud magkuha sang self-learning modules para sa mga estudyante.
