Ginapaabot na ni Bacolod Lone District Congressman Greg Gasataya ang report sang Department of Public Works and Highways (DPWH) sa nagluntad nga pagbinaha sa ciudad nagligad nga Byernes.
Suno kay Congressman Greg Gasataya, mismo siya ang nag-obserbar sang pagbinaha sang Byernes kag kasunod sini, ginmanduan niya ang DPWH nga tsekyarun ang tanan nga drainage systems, flood walls kag mga gibwangan sang mga suba sa ciudad agud masabat ang pila ka mga palamangkutunan tuhoy sa nagluntad nga baha, nagligad nga semana.
Suno kay Cong. Gasataya, posible bwas nga adlaw, makahatag na sang sabat ang DPWH.
Gin-ako ni Gasataya nga may yara man siya sang kaugalingon nga mga obserbasyon apang ginahulat sini ang report sang mga esksperto partikular na ang DPWH.
Samtang, gin-athag sang kongresista nga indi P1.5 billion ang budget sang drainage system sa Dalan Lacson nga gin-ubra duha katuig na ang nakaligad, kundi yara lamang sa P30-P50 million.
