Ginfilan sang reklamo sanday Negros Occidental 3rd District Representative Javi Benitez kag 26 ka iban pa bangod sa gina-alegar pag-operar sang isa ka bulangan sa Victorias City apisar nga wala sang franchise kag Resolution of No Objection (RONO).
Ang panumbungon ang ginfile sang 2023 pa, sang tion nga alkalde pa sa Victorias City si Benitez, samtang lakip man sa mga ginpasakaan sang reklamo ang iban pa nga mga opisyales sang ciudad.
Naggwa ang isyu matapos nga nagfile man sang perjury case si Congressman Javi sa complainant.
Sa interview sang Bombo Radyo Bacolod sa complainant nga si Bernard Ferraris, nagapati ini nga pagbayolar sa layi ang paghatag sang permit for construction kag permit to operate sa bulangan.
Magluwas sa wala sang franchise kag wala RONO, wala man nasunod sang negosyo ang requirement nga kalayuon sang bulangan sa pamalay nga indi dapat magnubo sa 200 meters.
Dugang pa sini nga ang basketball court sang Barangay sa ulu-unhan sang bulangan ang ginhimo na nga parking space gani indi na makahampang ang luyag nga maggamit sang court.
Pahayag pa ni Ferraris nga ginlambatan man ang dalan nga ginalabayan sang dalagko nga mga salakyan.
Suno diri, ang matuod nga tag-iya sang propedad nga ginhingadlan sini nga si Thomas Louis ang may address nga Pasig City kag indi pumuluyo sang Victorias City.
Nahibaluan nga ang business permit sang bulangan ang nakapangalan kay Jimmy Banguanga.
Suno kay Ferraris, si Banguanga ang dummy lamang bangod ini ang nagapuyo sa squaters area kag dubaon ang balay, gani ini ang maathag nga wala sang kapasidad sa pagpatukod sang negosyo.
Ginpadulungan man sang Bombo News Team ang balay ni Banguanga, apang wala ang tagbalay.
Panindugan ni Ferraris nga nakapagkit sa layi nga kinahanglan residente sa lugar ang nagapanag-iya sang negosyo kag may City Ordinance man nga kinahanglan may franchise antes maka-operar ang negosyo.
Gani ginatindugan sini nga naglapas sa layi si Benitez kag iban pa nga opisyales sadto sa paghatag sang permit sa nasambit nga bulangan.
