Nagpadala si Congressman Albee Benitez sang food packs kag reilef goods para sa mga pumuluyo nga naapektuhan sang sunog sa Purok Katilingban, Barangay 39, Bacolod City.
Nahibaluan nga nagdangat sa 89 ka mga panimalay ang nahalitan sang sunog kun sa diin siyam diri ang partially damaged samtang 80 naman ang totally damage.
207 ka pamilya naman ukon 849 ka mga indibidwal ang apektado sang sunog kag ginabanta masobra P1.7 million ang balor sang halit sa nasambit nga insidente.
Sa interview sang Bombo Radyo kay Bacolod City Association of Barangay Captains (ABC) President Councilor Lady Glez Palen, 900 ka mga foodpacks ang ginpanagtag sa mga evacuees nga temporaryo yara sa gym sang Barangay 39 nga nagserbe bilang evacuation center.
Suno diri, dako nga bulig ang paghatag sang mga hot meals sa mga evacuees nga amo ang ila ginpanyapon kag ang mga folding beds kag sleeping kits man nga ginpadala sang Bacolod Local Government Unit (LGU).
Dugang pa, may ara man sang financial assistance nga ginapreparar pa nga mahimo ipanghatag.
Mensahe sini sa mga pumuluyo nga ginakasubo nila ang natabo nga insidente kag pasalig nga padayon ang panghatag sang bulig sa mga otoridad.
