Dako ang pagpati ni Negros Oriental 3rd District Representative Arnolfo “Arnie” Teves Jr. nga yara sa delikado ang iya kabuhi ukon siya ang pagapatyon kun ini magbalik sa Pilipinas.
Suno kay Teves, apisar pa nga si President Ferdinand “Bongbong” Marcos Jr., nga may pinakamabaskog nga pwersa sa pungsod ang maghatag sang seguridad sa pagtapak sini balik sa Pilipinas, indi ini sa gihapon kumbinsido.
Pahayag ni Teves, kun indi ini makakuha sang patas nga pagtrato, siya ang mahimo nga patyon.
Paathag ni Teves, nga kun siya ang patyon masirado na gilayon ang kaso bangod nga wala na sang ginakabig nga mastermind, samtang ang mga nagapato-pato sa iya amo ang mangin gwapo kag sikat sa mata sang publiko.
Nagahingyo gid lamang ini nga kuntani patas lang ang tanan kag untaton ang sobra -sobra na nga pagpangharass sa iya.
Samtang, suno kay Teves padayon sa gihapon ang pagserbisyo sini sa iya constituents kag sa tanan nga luyag mangayo sang bulig.
Iya man ginpasalamatan ang pumuluyo sang 3rd district sang Negros Oriental, kag mga pumuluyo sa bug-os nga Pilipinas nga nagapadayon nga nagasuporta kag nagapangamuyo para sa iya.
