Natandog ang balatyagon sang kongresista sang 5th District sang Negros Occidental matapos nga ginhatagan sang saging sang mga residente nga apektado man sang Bagyo Tino.
Sa interview sang Bombo Radyo Bacolod kay 5th District Representative Dino Yulo, ang ginhimo sang mga residente sang Binalbagan nga naghatag sang saging apisar nga sila ang nabagyuhan man ang makatandog sang balatyagon.
Suno kay Yulo, ang nasambit nga tikang ang nagapakita lamang sang sinyale sang paglaom.
Suno diri kun sa bibliya pa wala sang imol nga indi makahatag kag wala sang pinakamanggaranon nga wala nagakinahanglan.
Nagalaom ang kongresista nga makahatag ini sang paglaom kag inspirasyon sa tanan.
Samtang padayon naman ang pagpangita sang mga missing bangud sa pagbaha.
Ang tuman nga naapektohan sang pagbaha sa 5th District amo ang banwa sang La Castellana.
Ginpadulungan man nila ang isolated nga Barangay sa Binalbagan kag didto nakita kun ano ka importante ang mangrove sa pagprotekta sa mga pumuluyo gikan sa bagyo.
Nagpanugyan ini sa mga residente nga magsunod sa mga otoridad kun kinahanglan ang preemptive evacuation para sa safety sang tanan.
