Liwat naman nga nagpangbiktima ang scammer nga nagagamit sang pangalan ni Bacolod City Lone District Congressman Greg Gasataya agud nga mag-order sa mga restaurants kag coffee shops sa ciudad sang Bacolod.
Sa interview sang Bombo Radyo kay Gasataya, ginpakigbahin sini nga natabo naman ang kaangay nga modus sang nakaligad nga mga tinuig.
Kahapon sang hapon, nagtawag ang isa ka restaurant kay Bacolod City Councilor Israel Salanga, natuhoy sa pag-order sang nagpakilala nga si Gasataya sang mga pagkaon para sa 30 ka mga persona.
Ginpasalamat naman sang Kongresista nga nagtawag sa iya si Salanga agud kumpirmahon kun nagpareserve gid man ini sa restaurant.
Rason sang scammer sa pag-order amo ang hemu-hemo nga magapatigayon sang meeting sa ciudad kaupod ang Department of Health (DOH) kag Philippine National Police (PNP) kag magadangat sa 30 ka mga persona.
Ang scammer nga nagapakilala nga si Congressman Greg Gasataya ang nagagamit sang numero nga 09268828981.
Ginpakamaayo naman ni Gasataya nga nagkumpirmar anay ang restaurant sa ila opisina.
Magluwas dira, may isa man ka coffee shop sa Barangay Mansilingan ang nakabatun sang kaangay nga reservation gamit ang kaangay nga numero.
Ginapasalamat ni Gasataya, nga antes ideliver ang order, nagpadulong anay sa iya opisina ang personnel sang coffee shop agud nga seguruhon kun nakapareserve gid man ini.
Nagpaandam ang kongresista, nga maghalong ang mga restaurants kag coffee shops sa mga kaangay nga modus, kag sarang man nga magkumpirmar pinaagi sa pagpanawag sa Telephone Number sang ila opisina.
