Nagpanawagan si Bacolod City Lone District Congressman Greg Gasataya nga likawan ang pagpalapta sang indi matuod-tuod nga mga impormasyon agud indi mahalitan ang mga pumuluyo ilabi na sa tion sang pandemic.
Sa interview sang Bombo Radyo kay Gasataya, gin-athag sang kongresista nga wala sang kamatuoran ang nagalapta nga text message nga magahatag ang talatapan sang second tranche sang financial assistance subong nga adlaw, Setyembre 28, sa Old City Hall sang Bacolod.
Suno kay Gasataya, nagapadayon panagtag sang ayuda ang iya opisina humalin pa sang nagsugod ang pandemya apang ginatawgan sang staff sini ang mga benepisyaryo kag wala ginapaagi sa text message.
Suno sa iya, nagaplano man ang Bacolod Congressional Office nga ipausisa sa Philippine National Police ukon National Bureau of Investigation ang pagpalapta sang nasambit nga text message para mahibaluan kun sino ang responsable sini.
Nagapanawagan man ini nga likawan ang pagpalapta sang “misinformation” agud nga indi mahalitan ang mga pumuluyo ilabi na sa karun nga may ginapangatubang nga pandemic.
Nagpanugyan man ini sa publiko nga indi gilayon magpati sa mga nagalapta nga text messages kundi mahimo magtawag anay sa congressional office sa telephone number 432-9017 agud i-verify ang mabaton nga impormasyon.
