Nagpagwa sang bag-o nga set sang mga dokumento si Batangas Representative Leandro Legarda Leviste nga ginapanag-iyahan sang nagtaliwan nga anay Undersecretary sang Department of Public Works and Highways (DPWH) nga si Maria Catalina Cabral.
Ginalauman nga ang mga dokumento ang naga-unod sang detalye sang alokasyon sang pondo sa tagsa ka distrito, probinsya kag rehiyon halin sang tuig 2023 tubtob 2026.
Ginpahayag ni Leviste sa isa ka post sini sa iya facebook page nga ang kabug-usan nga alokasyon para sa mga proyekto sang DPWH sa bilog nga pungsod naglab-ot sa P3.5 trillion pesos.
Ang Central Luzon ang nakabaton sang pinakadako nga alokasyon sa ginaproponer nga national budget para sa tuig 2026 nga nagabalor P406.9 billion.
Ginsundan ini sang CALABARZON nga may P341.8 billion kag Bicol Region nga may P272.3 billion.
Ginpahayag man ni Leviste nga ang mga numero ang may kaangtanan sa House General Appropriations Bill (HGAB) kag posible pa magbag-o depende sa bersyon sang Senado kag sa pinal nga resulta sang bicameral conference committee.
Ginpaguwa man ang datos sang mga distrito sa NCR nga may pinakadako nga alokasyon, kun sa diin nanguna ang 1st District sang Taguig City nga may P18.43 billion, ginsundan sang 4th District sang Quezon City nga may P14.17 billion kag 1st District sang Valenzuela City nga may P9.707 billion.
Sang Miyerkules, ginpaguwa man ni Leviste ang kabahin sang mga dokumento nga ginhatag sa iya ni Cabral sang Setyembre nga may kaangtanan sa alokasyon sang pondo para sa mga infrastructure project sa tuig 2025.
