Nagpanawagan si Batangas 1st District Representative Leandro Leviste sa gobyerno nga protektahan ang mga nangin kaupod ni anay Department of Public Works and Highways undersecretary Maria Catalina Cabral.
Nagapati si Leviste nga madamo sang mga nahibal-an ang mga nangin staff ni Cabral, kasunod sang madamo nga mga file nga ginahuptan sini.
Lakip sa ginalantaw ni Leviste ang mga encoder ukon ang mga nagsulat sang mga file nga yara kay Cabral.
Kabahin man diri ang iban pa nga staff ni Cabral nga may ideya sa sulod sang mga nasambit nga file.
Ginapanugtan man ni Leviste nga si DPWH Assistant Secretary for Planning, Public-Private Partnership, and Legislative Liaison Office Alex Bote ang isa sa dapat hatagan gilayon sang proteksyon sang gobyerno.
Suno sa mamalidha, si Bote amo ang nagtalana kag nag-ayo sang iya hearing kay Cabral pila ka bulan na ang nagkaligad.
Nagapati si Leviste nga tubtob subong may kopya pa sa gihapon ang anay opisina ni Cabral sang mga file.
Samtang, luwas sa mga written document may yara man sang mga video kag iban pa nga mga klase sang digital file kun sa diin yara diri ang mga listahan sang tanan nga public infrastructure project sa bilog nga pungsod, ang ila lokasyon, mga proponent, pondo kag iban pa nga importante nga impormasyon.
