Indi man mahangpan ni Agri Partylist Representative Wilbert Lee kun nga siya ang wala ginpahanugutan nga makahambal sa ulihi nga adlaw sang session sang House of Representative may kaangtanan sa budget sang Department of Health para sa 2025.
Sa interview sang Bombo Radyo Bacolod sa kongresista, ang tuyo lamang sini kuntani amo ang mabasa ang mga naangkon nga commitment agud mabatian sang publiko, mabutang sa record, kag ini ang ila man nga mabantayan ang pagpatuman.
Ini ang ginalakipan sang commitment sa pagpasaka sang dugang nga 50 porsyento sa benefit coverage sang Philippine Health Insurance Corp. (PhilHealth) para sa tanan nga balatian, 80 percent coverage sa chemotherapy, CT Scan kag Magnetic Resonance Imaging (MIR) kag iban pa, nga mangin epektibo sa Nobyembre subong nga tuig.
Suno diri siya ang ginabalabagan nga maghambal sang isa sa sponsor sang DOH budget.
Panindugan ni Lee nga ini ang wala sang tuyo nga grand standing kag luyag lamang mahibaluan sang publiko ang development bangod ang ginagamit nga kwarta ang iya sang pumuluyo.
Nagapati ini nga suportado ni House Speaker Martin Romualdez ang iya lihok kag nagpasalig nga wala natapos sa paghatag sang commitment sang mga ahensya ang iya tikang, kundi tubtob sa pagpatuman sang ila mga promisa.
Gintindugan naman ni Majority Floor Leader Congresswoman Janette Garin nga nagakaigo lamang ang ila pagtapos sang interpolation para sa proposed P6.352 billion National Budget para sa fiscal year 2025.
Paathag sang anay DOH Secretary nga kahapon ang ulihi nga session sang Kamara kag sila ang magapatigayon sang break agud hatagan sang ligwa ang filing sang Certificate of Candidacy para sa 2025 Midterm Elections.
Suno diri, sa nasambitan nga tion kinahanglan man nga magbalik sang mga kongresista sa ila nga mga lugar.
Magabalik ang session sa Nobyembre gani indi kinahanglan nga indi matapos ang budget deliberation para sa 2025 National Budget.
Pahanumdom ni Garin nga ang DOH na lamang ginahulat bangod natapos na ang budget hearing sa tanan nga ahensya sang gobyerno kag pila ka semana naman ang mga ini nga ginpabalik-balik.
Nahatagan naman sang pila ka kahigayunan si Agri Partylist Representative Wilbert Lee nga makahambal gani apisar sa pag-agaw sini sang mikropono sa kagustuhan nga maghatag sang dugang nga pamangkot, ini ang wala na ginpahambal.
Paathag ni Garin nga tuman na ka gab-i antes natapos ang interpolation, kag madamo pa sang trabahuon kasunod sini, kalakip na ang isa isa nga pagkuha sang boto gikan sa masobra 300 ka kongresista.
Indi naman sila mahimo maka-extend sa subong nga adlaw sang session bangod ini ang naschedule nagid lamang tubtob kahapon.
