Ginapanawagan ni Agri Patylist Representative Wilbert Lee nga mapahalin sa pwesto si Department of Health Secretary Teodoro Herbosa.
Sa interview sang Bombo Radyo Bacolod kay Congressman Lee, makaduha na nga nagpirma sang commitment letter ang tiglikom.
Panindugan sini nga ang commitment ang indi sa tunga nila nga duha kundi commitment sini sa mga pumuluyo.
Suno sa kongresista, nagdangat na sa P504 billion ang nakatago lamang nga budget sang Philippine Health Insurance Inc. (PhilHealth) kag ini ang dapat nga gamiton sa benepisyo sang mga pumuluyo.
Naghatag na sang timeline si Herbosa sa patigayunon nga pagpasaka sang benefits sa libre nga bulong kag pagpabulong sa kada bulan.
Apang suno kay Lee wala gid ini sang may gintuman apisar nga santo sa commitment, ang adjustment sa benefits ang dapat nagsugod sa bulan pa lamang sang Oktubre.
Panindugan sini nga dapat ma-islan na ang DOH Secretary bangod kun magpabilin pa sa pwesto, indi gid mahatagan sang katumanan ang commitment.
Ini bangod si Herbosa ang head sang benefits committee kag kabahin sang board sang PhilHealth gani kun gustuhon ini ang may ikasarang sa pagpatuman.
Suno sa kongresista, sa kada adlaw madamo sang nagakapatay bangod indi gusto nga dal-on sa ospital bangod wala inug-bayad ukon nahadlok nga malumos sa utang.
Para kay Lee si Herbosa ang bulag, bungol kag wala sang balatyagon.
Pahanumdom sini nga sa idalom sang Universal Health Care Law, kun may balatian kag wala sang kwarta sa pagpabulong, ini ang sabton sang gobyerno.
Gani nagakaigo suno diri nga maislan sang bag-o nga DOH Secretary nga may tagipusuon kag malasakit, indi nga halos magluhod pa ang mga pasyente ukon mamalimos antes buligan.
