Ginalantaw sang House Deputy Minority Leader nga dapat mapanabat man ang mga personalidad nga nagtinguha nga mapunggan ang pagka-aresto kay Pastor Apollo Quiboloy.
Sa interview sang Bombo Radyo Bacolod kay Alliance of Concerned Teacher’s (ACT) Representative France Castro, ginapakamaayo sini nga nagsurrender na si Quiboloy apang kuntani ini ang madugay na nga ginhimo.
Kun sadto paman nagsungka na ang pastor, pahayag ni Castro nga kuntani wala na sang may nasamaran sa bahin sang kapulisan kag Kingdom of Jesus Christ member.
Nagapati si Castro nga ginhimo lamang sang kapulisan ang ila responsibilidad sa pagserbe sang warrant of arrest sa ila operasyon sa KOJC compound.
Nagalaom ang kongresista nga mabatun na sang mga biktima sa sexual harrassment kag iban pa nga kaso ni Quiboloy ang hustisya.
Pangabay sini nga magsabat man sang maayo kag tampad si Quiboloy.
May kaangtanan sini, dapat nga pasabtun man ang mga tawo nga nagpangita sang paagi nga indi maaresto ang pastor.
Pahanumdom sini nga si former President Rodrigo Duterte ang ginbutang nga property custodian ni Quiboloy.
Open-secret naman suno diri nga si Quiboloy ang nagasuporta pinansyal kay Duterte.
Panindugan ni Castro nga makabig obstruction of justice ang ginahimo nga pagtago sa pastor.
Ilabi na nga si former President Duterte ang nagapahayag nga nakahibalo ini kun sa diin ang pastor apang wala nagpanugid.
Sa pihak sang kaso sa pastor, nagpasalig man si Castro sa mga KOJC members nga mapabilin ang ila freedom of religion ukon kinamatarong sa pagpati apisar nga naga-atubang sa layi ang ila pastor.
