Ginatindugan ni House Deputy Speaker kag Iloilo 1st District Representative Janette Garin nga sang 2017 tubtob 2018 ang pinakadako nga pagduging sang flood control projects, gani ini ang ginalakip sa imbestigasyon sang House of Representatives.
Apang sa pagtukod sang Independent Commission for Infrastructure, isumiter man nila ang tanan nga mga natipon nga ebidensya sang Kamara.
Sa pihak sini, gintindugan ni Garin nga wala nila ginalikaw ang imbestigasyon gikan sa mga anomalya nga natukiban halin sang 2023 tubtob 2024.
Nagapati si Garin nga indi na malakip ang 2025 bangod naglupok na ang isyu.
Apang suno diri, kun lantawon gid ang systema, ini ang nagsugod sang 2016 kag ang pinakarampant ang narecord sang 2018.
Wala naman sini ginapahayag nga involved ang nakaligad nga administrasyon, apang ang sindikato ang nag-umpisa sa amo nga tuig kag nagpadayun tubtob sa karun.
Suno diri, may masterplan para sa pagtukod sang taytay, dalan kasubong man sang flood control projects, apang ini ang ila nga ginasuli, ginpalos ang safeguards, samtang ang mga ginaban sadto ang pasekreto nga ginapadayun.
Suno diri may mga sabwatan na nga nagakatabo sa pila ka mga personalidad kag sang opisyales sang Department of Public Works and Highways (DPWH).
Samtang kun indi ang mga ini magsunod, yara ang risgo nga sila ang ire-assign sa lain nga lugar.
May mga ginakuha man nga ahente, kag daw kaangay sang bidding nga kun sin-o ang maka-offer sag mas dako nga porsyento amo ang hatagan sang proyekto, nga nagresulta mga ghost projects.
