Aminado si Iloilo 1st District Representative Dr. Janette Garin nga indi nila luyag ang nagakatabo apang sila ang nagpirma sa impeachment complaint batok kay Vice President Sara Duterte bangod sila ang may Constitutional responsibility.
Sa interview sang Bombo Radyo Bacolod sa Kongresista, indi man niya gusto ang nagakatabo apang nakatipon na ang House of Representatives sang dako kag kompleto nga ebidensya.
Mabudlay suno sa iya nga indi magpirma bangod bilang Constitutional duty, indi sila pwede nga magpatumbaya lamang kun indi maathag kun diin gingamit ang pondo sang gobyerno.
Ginpanginwala man sini ang alegasyon ni Davao City 1st District Representative Paolo Duterte nga siya ang nagpalakat sang impeachment complaint batok sa iya magulang, agud makatipon sang 215 ka pirma.
Ginapalantaw ni Garin nga mahimo may-ara lamang sang nag-intriga ukon sala lamang ang paghangop ni Congressman Pulong Duterte.
Panindugan sini nga madamol ang impeachment complaint kag mabudlay nga bitbiton ilibot kag papirmahan sa masobra 200 nga kongresista.
Dugang pa sini nga may kinaiya nga kaalam kag paghangop ang mga kongresista kag indi ang mga ini basta-basta madiktahan sa pagpirma sa impeachment complaint.
Nagapati ini nga kalakip sa nakaganyat sa mga kongresista nga magpirma ang pahayag ni VP Sara nga siya ang naghire sang assassin nga magapatay kanday President Ferdinand “Bongbong” Marcos Jr., First Lady Liza Araneta Marcos kag House Speaker Martin Romualdez kun may-ara sang magapatay sa iya, nga maathag nga betrayal of public trust.
Kasubong man ang confidential funds nga wala matumod kun diin nagkadto ukon diin gingamit.
Suno diri, maayo nga sa Senado ang impeachment trial agud makasabat man sa alegasyon si VP Sara, bangod ini ang halos wala nagasabat sa mga pamangkot sa House inquiry sang tinalikdan.
Gani nakita ni Garin nga ini ang pinakamaayo nga oportunidad para kay VP Sara nga maklaro ang iya pangalan.
Sa karun, ginahatag na nila sa Senado ang bola sa pag-assess sang ebidensya.
