Gin-athag ni Negros Occidental Provincial Administrator Atty Rayfrando Diaz nga wala pa ma-award ang P1.2 billion Bulk Water Supply Project sang probinsya sa sa lone bidder.
Nahibaluan nga ini ang Public-Private-Partnership (PPP) project sang provincial government sa private company, kun sa diin ang probinsya ang may investment nga P200 million.
Sa ginpatigayon nga bidding process sang Disyembre 11, isa lamang ka bidder ang nagpasa sang bid documents nga amo ang consortium sang tatlo ka kompanya nga ginalakipan sang First Balfour Inc., Victorias Milling Co. kag FPIP Utilities Inc.
Sa interview sang Bombo Radyo Bacolod kay Diaz, gin-athag sini nga ginapaidalom pa sa post-qualification process ang consortium kag mahimo sa Enero ukon Pebrero pa mapat-od kun ini ang pasado nga magkapot sang proyekto.
Nahibaluan nga ang Bulk Water Supply Project ang magakuha sang water supply gikan sa Malugo river kag Imbang river kag indi sa underground water.
Ang initial bid price ang yara sa P22 per cubic meter apang suno kay Diaz, sila ang magakonsulta pa sa pila ka mga utility companies agud maseguro nga nagakaigo ang presyo.
Ginapakamaayo naman sang Provincial Administrator nga may nalakip nga local company sa consortium.
Samtang nalakip naman ang Bulk Water Supply Project sa nahatagan sang exemption sang Commission on Election (Comelec) sa banning para sa election period.
