Nagapadayun man sa karon ang construction sang Alangilan-Murcia Road nga may kalabaon nga 1.72 kilometros.
Ang proyekto ang may budget nga P40 million.
Suno kay Bacolod City Lone District Congressman Greg Gasataya, 11 inches ang kadamulon sang semento sa ginatukod nga dalan bangod ini ang masami nga ginalabayan sang mga dalagko nga truck.
Ang dalan ang anay tuman ka batuhon kag mabudlay labayan.
Nag-umpisa ang construction sadtong Oktubre 2020 kag ginabanta nga matapos sa masunod nga bulan, Abril 2021.
Ang highway ang pagabutangan man sang drainage sa duha ka kilid.
Suno kay Gasataya, madugay na nga plano nga makabutang sang konkreto nga dalan ang Bacolod nga sarang makonekta sa mga banwa kag ciudad sa probinsya.
Nag-umpisa ang proyekto sadtong 2018, sang gintukod ang dalan sa Bacolod nga ginkonekta sa Barangay Concepcion, Talisay City, Negros Occidental.
Sa karun ang ginapatukod amo ang konkreto nga dalan nga magakonekta sa Barangay Alangilan, Bacolod City kag Barangay Alegria, Murcia, Negros Occidental.
Ini ang may kaangtanan sa proposal nga makonekta ang Bacolod sa pila ka distrito sa probinsya, nga makabulig sa pagpadasig sang pagbyahe sang mga motorista kasubong man bentaha sa bahin sang negosyo kag turismo.
