Ginalantaw nga bangongot ang ginkamatay sang 37 anyos nga construction worker sa BS Aquino Drive, Barangay 5, Bacolod City, nga nasapwan nga wala na sang kabuhi kaina sang kaagahon.
Sa interview sang Bombo Radyo Bacolod kay Minggoy Esperales, ang napatay ang ginkilala nga si Eric Locsin, tumandok sang Barangay Bantayan, Kabankalan City, may asawa kag mga kabataan.
Suno diri, masobra isa ka tuig na sila nga nagaconstruct sa commercial building kag didto man nagatulog.
Pahayag sini nga sa isa ka tuig halos wala nakaagi trangkaso si Locsin.
Maayo paman ang pamatyag sini kagab-i, kun sa diin sa 11 ka mga construction worker, siyam sila ang ulupod nga naglantaw sang movie sa cellphone mismo sang napatay.
Dugang pa ni Esperales nga alas-9:00 sang gab-i sila nagtulog kag sa masami bugtaw na alas-4:00 sang kaagahon, apang sang ginpukaw sang ila kaupod kapin alas-6:00 kaina sang aga, mayami na nga bangkay si Locsin.
Suno diri, naga-isahanon lamang nga nagatulog si Locsin sa isa sa mga kwarto.
Gincontact naman nila ang asawa sang biktima, kag napadulongan naman ang mga katapos sang Bacolod Police Station 4 kag City Disaster Risk Reduction and Management Office (CDRRMO).
