Ginalantaw pa sang Bacolod Police Station 6 kun may kaangtanan ang constuction worker nga ginluthang patay sa Purok Masagana, Barangay Taculing sang Hulyo 10 sa himata sini nga napriso bangod sa pagbaligya sang illegal nga droga.
Madumduman nga ang biktima nga si Niño Baldevia, 37 anyos, ang nagatambay sa gwa sang ila balay kaupod ang apat ka iban pa sang hinali na lamang nag-abot ang riding in tandem suspect.
Suno sa bata nga nakawitness nga nagpanaog ang backrider dala ang baseball bat kag ginhan-usan ang isa sa mga lima nga nagatambay, gani sila ang gilayon man nga nagdinalagan.
Apang si Baldevia ang nabilin, kag ini ang makapila ka beses nga ginluthang.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 6, indi pa nila maseguro kun riding in tandem gid man ang suspect bangod wala makita sa CCTV footage.
Isa sa ginatutukan sa karun amo ang posibilidad nga konektado si Baldevia sa isa sini ka himata nga yara karun sa prisuhan bangod sa pagbaligya sang illegal nga droga.
Apisar nga nagakoordinar ang pamilya sang biktima, nagapati si Santillan nga may mga impormasyon pa ang mga ini nga wala ginahatag sa otoridad.
Isa man sa ginalantaw nga rasun ang personal grudge.
Magluwas sa pamilya ang kapulisan ang nagapangusisa man sa mga pumuluyo sa ila palibot.
