Yara na sa maayo nga kahimtangan ang 20 anyos nga construction worker matapos ginbuno sang iya site manager pasado alas-4:00 sang hapon, Nobyembre 17, sa bahin sang Broce Street, Barangay 4, ciudad sang San Carlos, Negros Occidental.
Ginkilala ang biktima nga si Renato Abitona Jr., 20-anyos, residente sang Caballero Ext., Barangay 2, samtang ang suspetsado ang ginkilala naman kay Windsor Patiag, 30-anyos, site manager kag residente sang Tarlac City apang temporaryo nga nagatinir sa nasambit nga ciudad.
Sa inisyal nga imbestigasyon sang kapulisan, nahibaluan nga nagkadto ang biktima sa suspek agud kuhaon ang iya sweldo apang P100 lang ang ginhatag sa iya.
Magluwas sini, ginkomprontar sang biktima ang suspek rason nga nagtaas ang tensyon sa tunga sang duha nga nagresulta sa komosyon, kag hinali nga nagkuha sang kutsilyo ang suspek kag ginbuno ang biktima.
Gilayon naman nga gindala sa San Carlos City Hospital ang biktima para sa nagakaigo nga pagbulong.
