Patay ang 19 anyos nga construction worker matapos nga ginbuno sa Villa Angela Phase II B Subd., Brgy Vista Alegre, ciudad sang Bacolod, kaina, alas-3:30 sang kaagahon.
Ang biktima ang ginkilala nga si Ernes Jan Olminasan alias “Mokong”, residente sang Prk. Lope Regalado, Brgy. Sta. Rosario, banwa sang Binalbagan, samtang ang suspetsado naman ang ginkilala nga si Mark Joseph Tupas, construction Foreman, kag residente sang Hda. Fe, Brgy. 12, ciudad sang Victorias.
Sa inisyal nga imbestigasyon, ginpukaw ni Olminasan ang tiyo sini nga si Alien Arevalo nga isa man ka construction worker para mangayo sang bulig.
Nakita sang tiyo nga may pilas sang pagpamuno ang hinablos sini nga nagtuad nga ang may kahimuan amo si Tupas.
Gilayon nga gindala sa ospital si Olminasan apang ini ang ginbawian sang kabuhi.
Samtang, nalagyo naman ang suspek sakay ang motor sini kaupod ang isa man ka construction worker nga si Aljohn Castro alias “Wa Wa” nga residente sang ciudad sang Cadiz.
