Nagapadayon ang contact tracing sa posible nakaupod ukon napalapitan sang COVID-19 patient no. 14 sa ciudad sang Bacolod.
Sa interview sang Bombo Radyo Bacolod kay Vice Mayor El CID Familiaran, chairman sang Inter-Agency Task Force (IATF), ginpahayag sini nga asymptomatic ang pasyente kag isa ka masubo nga balita bangud may yara naman sang nagpositibo sa Covid-19 nga wala sang ginpakita nga sintomas.
Suno kay Familiaran, na-isolate naman ang biktima kag kun frontliner ini, mahimo nga amo na ini ang rason sa likod sang pagpositibo sang pasyente.
Gin-athag man sini nga may yara na sang mando nga amat-amaton ka paidalom sa covid test ang mga frontliner kag kapulisan.
Ginpahayag man sini nga mas advatage kun may yara na sang mass testing sa lugar bangud mahibaluan na ang mga asymptomatic.
Ginpangabay man sini nga pangamuyuan nga wala ini sang nalatnan apisar nga wala siya sang ginpakita nga sintomas.
Samtang, ginpahayag man sini nga bangud sa kamahal sang RT-PCR test, wala sang ikasarang ang gobyerno nga magpatuman sang mass testing
Sa tion nga mag-operate na ang COVID laboratory sa private hospital, mahimo ang bisan sin-o nga makig-angot diri kag icharge lamang sa kaugalingon sini nga PhilHealth card.
Ginpahayag man ni Familiaran nga napirmahan na sang alkalde ang tatlo ka ordinansa nga ginpasar ni Councilor Archie Baribar.
Ang mga ordinansa ang ginalakipan sang pagmulta sang P200 sa mga wala nagausar sang face mask; P300 sa wala nagatuman sang social distancing; kag P1, 000 sa naglapas sa curfew.
Samtang ginahingyo man sini ang pasensya sang mga LSI’s ukon locally stranded individuals nagikan sa nagkalain lain nga lugar sa Pilipinas bangud ginaamat-amat naman ang mga ini papauli sa pagpanguna sang committee ni Councilor Cindy Rojas.
Nagpangabay man ini nga magsunod sa pagsulundan bangud kun magsige taas ang kaso, mahimo nga ibalik sa Enhanced Community Quarantine (ECQ) kag madamo naman ang indi makatrabaho.
