Indi pa mapat-od sa karun kun sa diin nalatnan sang coronavirus si patient number 14 sang Bacolod City.
Sa interview sang Bombo Radyo Bacolod kay Punong Barangay Lady Glez Gonzales Pallen sang Barangay Taculing kag ABC president sa ciudad sang Bacolod, ginpahayag sini nga indi pa matumod kun sa diin nalatnan ang 36 anyos kag asymptomatic nga pasyente bangud wala ini sang travel history kag isa ini ka frontliner sang Department of Education (DepEd) bangud isa ini ka nurse.
Dugang pa sini nga may yara man sang negosyo nga pag-import kag export sang mga panakot nga mahimo naexpose ini sa produkto nga nagikan sa China kun sa diin labing-una nga nareport ang kaso sang COVID.
Suno kay Pallen, may mga inisyal na ini nga impormasyon natuhoy sa pasyente.
Ginpahayag man sini nga iga assess pa sang City Health Office kag PNP kun kinahanglanon nga iseal-off ang lugar ukon ang balay lamang sini sa isa ka subdivision sa Barangay Taculing.
Suno kay Pallen, ika-apat na ini nga kaso sang COVID sa Barangay Taculing.
Madumduman nga ang duha ang nagtaliwan na samtang ang isa ang nag-ayo na.
