Halos 80% na ang mga nacontact trace sang City Health Office kag Bacolod City Police Office nga mga napalapitan ni Bacolod Patient No. 89, empleyado sa Old City Hall nga nagpositibo sa COVID-19 sang Martes.
Sa interview sang Bombo Radyo kay Mayor Evelio “Bing” Leonardia, ginpahayag sini nga sang ila nahibaluan nga nagpositibo ang nasambit nga empleyado, gilayon nga ginlock-down ang opisina nga gina-ubrahan sini kag gindisinfect ang bilog nga Old City Hall.
Nagpatigayon man sang swab test sa 20 ka mga empleyado nga kaupod sini sa ubra.
Nahibaluan suno sa alkalde nga nagpadulong man ini sa Bacolod Government Center kag naglibot sa nagkalain-lain nga mga opisina gani ginsiraduhan ini kahapon bangud nagpatigayon sang disinfection.
Suno sa alkalde, tuman ka importante ang pagpatigayon sang contact tracing gani naghiwat man sila sang isa ka seminar nahanungod diri sang Martes agud matun-an ang mga epektibo nga pamaagi para mapadasig ini.
Ginhatagan man sini sang pagtamod ang importansya sang mga kapulisan sa pagpatigayon sang contact tracing kag magahatag man sila sang mga PPEs sa mga ini.
Naghingyo man si Leonardia sa mga pumuluyo nga ingkaso magpositibo ang mga ini sa virus, maghambal gid sang matuod bangud kun magbinutig sila, wala gihapon sang pakadtuan ang pagpangabudlay sang gobyerno.
