Gin-athag sang provincial director sang Negros Occidental Police Provincial Office nga contempt order ang gindagdag sang House of Representatives batok kay Silay City Legal Officer Atty. Janus Jarder kag indi warrant of arrest.
Sa interview kay Police Colonel Rainerio de Chavez, ang contempt order ang gindala nila sa balay sang City Legal Officer sang Silay City apang wala ini sa ila balay.
Suno kay de Chavez, kun natabuon nga yara sa ila puluy-an ang City Legal Officer sang nasambit nga ciudad, updan ini sang mga kapulisan padulong sa detention facility sang Kamara.
Madumduman nga gin-cite in contempt si Jarder sang House Committee on Public Accounts, sa pagpanguna ni Abang Lingkod Partylist Representative Joseph Stephen Paduano sadto sa ginpatigayon nga inquiry may kaangtanan sa ginaalegar iregularidad sa procurement process sa P1.1 billion nga loan sang ciudad.
Ini kasunod sang ginapahayag nga pagbinutig sang city official sa mga pamangkot sang committee.
Matandaan man nga ginpahayag ni Silay City Health Officer Dr. Krisna Barnuevo nga sadtong November 10, 2024 ukon gab-i antes ang una nga hearing sadtong November 11, 2024 gin-abisuhan ni Jarder ang mga magatambong nga indi magkaon ukon mag-inom sang gina-serbe sa hearing bangud posible may impon ini nga droga.
Dugang pa ni Dr. Barnuevo nga ginhambalan siya ni Jarder nga indi magtambong sa hearing sa Kongreso kag gintawag pa siya sang abugado nga “congenital liar”.
