Sa kabudlay sang sitwasyon sa karun bangud sa kamahal sang mga balaklon dala sang tuman nga pagmahal sang produktong petrolyo, madamo na ang nagahimo sang diskarte kaangay lamang sa paghimo sang video nga makakuha sang atensyon sang mga online viewers.
Kaangay na lamang sang isa ka Brazilian content creator nga naghimo naghimo-himo sang estorya sang kidnapping agud lang nga magdamo ang iya online followers.
Sang nagligad nga tuig, gin-post ni Monniky Fraga sa iya social media account nga gin-kidnap siya kaupod sa iya bana nga si Lucas samtang nagapauli sila sa ila balay.
Suno diri, gindala sila sa isa ka lasang kag ginpangayuan sang ransom ang ila pamilya.
Dugang pa ni Fraga, ginbuy-an sila kag gilayon nga nag-report sa kapulisan si Lucas nga ginsapote sang tatlo ka mga lalaki.
Nagpatigayon sang imbestigasyon ang Civil Police pinaagi sa Special Operations Group (GOE) kag natumod nga gin-stage ni Fraga ang hitabo kaupod sa mga gina-alegar suspek.
Apang wala sang ihibalo sini ang iya bana.
Isa ka tuig pagkatapos sini, gin-aresto si Fraga bangud sang extortion, procedural fraud, kag pag-file sang peke nga police report.
Ang isa sa gina-alegar accomplice ang na-aresto na, napatay ang isa kag padayon nga ginapangita ang isa pa.
