Ginalantaw nga sarang matapos subong nga tuig ang pagtukod sang bag-o nga Bacolod City Legislative Building.
Sa interview sang Bombo Radyo Bacolod kay Engr. Loben Ceballos, officer in charge sang Bacolod City Engineer’s Office, 35 porsyento na ang completion sang Bacolod City Legislative Building nga may budget nga P515 million.
Ang proyekto ang gin-umpisahan sang Disyembre 2023 kag santo sa kontrata matapos sa sulod sang 18 ka bulan.
Apang suno kay Ceballos, ginapaspasan sang contraktor ang pagtrabaho gani makita na sa karun ang paghuman sang tatlo ka panalgan nga building.
Pahayag sini nga ang contractor mismo ang nagcommit nga tinguhaan sini nga matapos ang proyekto subong nga tuig.
Samtang ginalantaw man nga ireallign ang pila ka bahin sang P525 million budget sang Burgos Public Market, matapos nga wala nagsugot ang mga vendors sa rennovation sang merkado.
Sa tion nga mahuman na ang building, isaylo diri ang mga talatapan nga naga-akomodar sang madamo nga tawo kaangay sang Department of Social Services and Development (DSSD).
May-ara man nga gintukod nga opisina para sa mga miyembro sang Sangguniang Panlungsod katupad sang session hall.
May-ara man sang helipad rooftop para sa chopper ni Bacolod City Mayor Alfredo ‘Albee’ Benitez.
Samtang ang orihinal nga football field ang himuon naman nga parking area, kag ginatun-an pa nga himuon nga football field ang bakante nga lote sa likod sang building.
