UPDATE: Gindeklarar nga Dead on Arrival sang gindala sa ospital ang isa ka contractor sa ginarenovate nga restaurant matapos marumpagan sang dingding sa Golden Field Commercial Complex, sa Barangay Singcang-Airport, Bacolod City pasado alas-12:00 kaina sang udto.
Ini ang ginkumpirmar ni Police Captain Greeky Cayao, station commander sang Bacolod Police Station 8.
Ang biktima ang ginkilala kay Erniel Lanza, 55 years old.
Ginpahayag nga ginbawian sang kabuhi ang biktima bangud sa pilas sa ulo tuga sang narumpag nga Dingding.
Suno kay Cayao, wala man sang nakita nga foul play bangud gin-demolish sang biktima ang CR sang ginarenovate nga restaurant apang sala ang pagtaltal sini nga sa ibabaw kuntani maumpisa sa idalom ang gin-una sini rason nga narumpag ang dingding kag natup-an ang ulo sini.
Kabahin sang interview kay Police Captain Greeky Cayao, station commander sang Bacolod Police Station 8.
Una na nga ginpahayag nga pilason ang biktima sang gindala sa ospital.
Sa interview sang Bombo Radyo Bacolod kay Edgar Grande, security guard, ang biktima ang kilala lamang sini nga si Alyas Nognog, yara sa 50s ang edad.
Si Nognog ang residente lamang sa Bacolod City kag masami man nila nga contractor bisan sa pagpaminta.
Ang gina-renovate amo ang bodega nga plano nga himuon expansion sang restaurant.
Sila ang kapin isa ka semana naman nga nagatrabaho sa lugar kag amat-amat na nga ginabakbak ang mga divisions.
Kaupod sini sa trabaho kaina ang iya bata kag pila pa ka tawo, sang hinali na lamang nga nabatian ang pagnilagabong sa CR.
Suno kay Grande, naabtan nila nga napilpilan sang sementado nga pader si Nognog kag ini ang may dugo sa ulo.
Gilayon man ini nga gindala sa ospital kag sa karun, wala pa mahibaluan ang medical bulletin sang biktima, apang sa paglantaw ni Grande, patal ang naangkon sini nga samad.
Kabahin sang interview kay Edgar Grande, security guard sa building
