Gin-issuehan sang notice of violation ang contractor sang ginatukod nga New Government Center sang Silay City.
Natukiban ini matapos nga wala sang building permit ang proyekto sang contractor nga Silver Dragon Construction and Lumber and Glass Supply.
Sa interview kay Silay City Building Officer Engr. Elmer Kent Torres, gin-serbe ang notice of violation sadtong Oktubre 18 apang wala nagpirma ang nagbaton sang dokumento.
Suno kay Torres, ginhatagan sang tatlo ka adlaw ang contractor ukon kutob sa Myerkules agud magpasa sang mga rekisitos para sa pagproseso sang building permit sa Office of the Building Official.
Magabayad man sang multa ang contractor sang nasambit nga proyekto bangud nag-umpisa sang proyekto nga wala sang building permit.
Dugang pa ni Torres nga bisan proyekto pa sang gobyerno ang kinahanglan gid nga mag-apply sang building permit bangud indi ini exempted.
Nahibaluan nga ang bag-o nga city hall sang Silay City ang nahamtang sa Hacienda Maquina sa Barangay Rizal, ang may pondo nga P500 million.
Ginpamangkot naman sang katapo sang media si Silay City Mayor Joedith Gallego angot sa pagdagdag sang OBO sang notice of violation ang construction sang city hall apang nagsabat ini nga tsekyaron niya pa ini bangud wala pa siya sang impormasyon.
