Aminado ang convenor sang Amlig Tubig nga palpak gid ang kontrata sang Bacolod City Water District (BACIWA) sa Bacolod Bulk Water Supply Inc. pito ka tuig na ang nakaligad.
Sa interview sang Bombo Radyo Bacolod kay former Councilor Wilson “Jun” Gamboa, sa kontrata ang Bulk Water ang magasupply lamang sang tubig, wala sang capital outlays kag wala man sang utang.
Apang santo sa kontrata sang 2016, sila ang magaprovide sang tubig gikan sa surface water kutob sa masarangan sa average price nga P9.25.
80 tubtob 85 porsyento sang water supply sadto ang nagikan sa deepwell nga nagdangat sa P14 per cubic meter, nga nagaka-utod pa sa tion sang brownout.
Suno kay Gamboa sa Imbang river dapat magakuha sang water supply ang Bulk Water, apang sila ang wala nakaangkon sang road right of way sa Barangay Mansilingan kun sa diin tuman naman ka mahal ang sukot sang tag-iya sang duta.
Apisar nga nalatag na ang mga tubo, ini ang wala gid nabuksan tubtob sa karun.
Sa baylo ang Bulk Water ang nagsalig nalang sadto sa sapa sa Barangay Alangilan, kag deretso nga gin-angot sa tubo sang BACIWA sa baylo nga sa injection pump.
Sa previlege speech sini sadto, ginkwestyon man sini ang kakulangan, apang ang BACIWA ang nagsabat nga sila ang magakutkot nalang sang anom ka deep well.
Panindugan ni Gamboa nga ang proyekto ang dapat salabton sang Bulk Water, kalakip na ang balayran sang mga ini sa liquidated damages, nadula nga mga oportunidad kag delays sa delivery.
