Ginakatingala sang convenor sa Amlig Tubig ang patigayunon nga pirmahanay sang kontrata sa tunga sang Bacolod City Water District (BACIWA) kag Bacolod Bulk Water Inc. bangod ini ang existing na nga kontrata.
Sa interview sang Bombo Radyo Bacolod kay former Bacolod City Councilor Wilson “Jun” Gamboa, siya ang isa sa proponent sadto sa kontrata sa administrasyon pa ni former Bacolod City Mayor Monico Puentevella.
Suno diri, tuman ka gamay ang presyo sadto sa pagbid sang Bacolod Bulk Water Inc. kun sa diin yara lamang sa masobra P9 per cubic meter magalawig sang 15 ka tuig sangsa karun nga P14 nga production cost.
Naglaom si Gamboa nga mga bag-o nga bulk water gikan sa Murcia, Talisay, Silay ukon Victorias nga luyag magsupply sang tubig sa ciudad ang magapirma.
Suno diri, ginakatingala sini kun ngaa wala gindayun ang maayo nga kontrata sadto bangod lamang sa problema sa right of way, gani sang mahibaluan nga ang pirmahanay ang sa tunga sang BACIWA Prime Water kag Bacolod Bulk Water Inc. nagpinsar na ini nga may-ara sang “into-anay”.
Ginalantaw ni Gamboa nga ginpreparahan sadto sang BACIWA ang pagsulod sang Prime Water kun sa diin sila ang nagsalo lamang sang existing nga mga water sources kag wala sang ginpasulod nga bisan tulo lamang nga tubig.
Sa pagsulod sang Prime Water, gilayon man nga nagsaka ang sukot sa tubig, sa panindugan nga sila ang may gindagdag nga dako nga investment.
Nagapati si Gamboa, nga lain na ang presyuhanay sang subong nga kontrata kag ini ang dugangan pa sang patong sang Prime Water, nga ipapa-an naman sa mga konsumedor.
Suno diri, mas barato ang tubig kun gikan sa mga spring water sa pila ka banwa kag ciudad sa probinsya sangsa deep water source sang Bacolod nga kinahanglan pa sang makina agud magsuyop sang tubig sa idalum sang duta.
